Известување за клиентите со кои Банката има склучено Догoвори за отвoрање и за водење денарска/девизна трансакциска сметка

Почитувани,

На ден 1.1.2023 година ќе започне да се применува новиот Закон за платежни услуги и платни системи (во понатамошниот текст: ЗПУПС). Договорниот однос што корисниците на платежни услуги го имаат воспоставено со Банката во периодот пред започнување со примена на ЗПУПС, во согласност со склучените договори коишто остануваат во сила, продолжува и по започнувањето на примената на ЗПУПС и сите негови измени и дополнувања.

Во согласност со законската регулатива, Ве известуваме дека платежните услуги ќе се извршуваат во согласност со постојните договори и со останатите документи коишто се составен дел на договорите и коишто се во согласност со одредбите на ЗПУПС и со подзаконските акти на Народната банка на Република Северна Македонија. Банката нема обврска да склучува нови рамковни договори со постојните корисници во согласност со ЗУПУС, но на барање на постоен корисник на платежна услуга, по отпочнување на примената на Законот, во рок не подолг од 30 дена од поднесеното барање, ќе склучи нов рамковен договор во форма и содржина во согласност со ЗПУПС.

Со оглед на тоа дека одредбите од ЗПУПС со кои се уредува содржината на рамковните договори се применуваат и за постојните корисници и се составен дел на постојните договори и тие ги дополнуваат и ги заменуваат договорните одредби од постојните договори, а во согласност со член 223 од ЗПУПС, во насока на ваше запознавање и информирање, се објавува содржината на одредбите на рамковниот договор во согласност со ЗПУПС како што следи:

1. Давател на платежни услуги (во понатамошниот текст: Банка)

Назив: ТТК Банка АД Скопје

Седиште: ул. „Народен Фронт“ бр.19а, Скопје

Матичен број: 6121110

Даночен број: 4030006597638

Број на сметка: 290-1000000000-46

Свифт адреса: TTXBMK2X 

Веб-страница: www.ttk.com.mk

Е-пошта: ttk@ttk.com.mk

Телефон за контакт: +389 2 3247 000

Надлежен орган за надзор на Банката е Народната банка на Република Северна Македонија.

2. Платежни услуги:

Банката како давател на платежни услуги ги овозможува следниве платежни услуги:

1) внесување и повлекување готовина на платежна сметка (до воспоставување нов ЕРС  до 20.12.2023 година ќе се применува терминот „трансакциска сметка“), како и сите активности поврзани со отворање, одржување и затворање на таа сметка;

2) извршување на платежни трансакции, вклучувајќи пренос на парични средства на платежна сметка кај Банката на Корисникот на платежни услуги или кај друг давател на платежни услуги:

   а) извршување на платежни трансакции со платежни картички или слични телекомуникациски, дигитални или информатички уреди и

     б) извршување на кредитни трансфери, вклучувајќи трајни налози.

3) извршување на платежни трансакции кај коишто паричните средства се обезбедени со кредитна линија за Корисникот на платежни услуги:

     а) извршување на платежни трансакции со платежни картички или слични телекомуникациски, дигитални или информатички уреди и

     б) извршување на кредитни трансфери, вклучувајќи трајни налози.

4) издавање платни инструменти и/или прифаќање платежни трансакции;

5) парични дознаки;

6) услуги за иницирање на плаќања (во примена од 20.2.2024 година) и

7) услуги за давање информации за платежните сметки (во примена од 20.2.2024 година).

Со цел инструкцијата со која се бара извршување на трансакција, во понатамошниот текст „платен налог“, да биде правилно иницирана и извршена, потребно е да биде комплетна и уредна.

Формата и постапката за давање на согласноста за иницирање платен налог или за извршување на платежна трансакција и за повлекување на согласноста за извршување на платежна трансакција или за отповикување на платен налог сè до донесување на подзаконската регулатива во согласност со член 42, став 9, точка 3 од ЗПУПС, ќе се врши во согласност со одредбите од постојните договори, интерните акти на Банката и важечката законска и подзаконска регулатива.

Време на прием на платниот налог е моментот кога Банката го примила платниот налог, исправен, комплетен и уреден. По приемот на платниот налог, Банката ја задолжува платежната сметка на плаќачот. Ако времето на прием на платниот налог е во неработен ден за давателот на платежната услуга на плаќачот се смета дека платниот налог е примен следниот работен ден. Времето на прием на налог за пренос е дефинирано со Терминскиот план за извршување на платните трансакции, кој е составен дел на договорите и кој е достапен на веб-страницата на Банката. Банката може да го изврши налогот за пренос и по истекот на рокот за извршување на налогот за пренос утврден со Терминскиот план за извршување на платните трансакции доколку тоа е последица на дополнителна проверка на документација побарана во согласност со законска регулатива и Банката не е одговорна за задоцнето извршување на налогот за пренос. Времето на прием и времето на извршување на платните налози ќе бидат детално предвидени со подзаконски акт на НБРСМ во согласност со член 42, став 9, точка 2 од ЗПУПС.

Максималниот рок за извршување на платежните услуги е во согласност со Терминскиот план за извршување платежни трансакции во платен промет во земјата кој е достапен на веб-страницата на Банката или во согласност со терминскиот план за платниот промет со странство, достапен на веб-страницата на Банката.

Ограничување на трошењето при користењето на одреден платен инструмент:

Кога платниот инструмент се користи за давање на согласноста за извршување на платежната трансакција, Корисникот и Банката може да договорат ограничување на потрошениот износ за платежните трансакции кои се извршуваат преку тој платен инструмент. Ограничувањето на трошењето ќе биде детално предвидено со подзаконски акт на НБРСМ во согласност со член 42, став 9, точка 2 од ЗПУПС.

Користење на средства од платежната сметка со дебитна картичка:

Корисникот има право да побара од Банката да му издаде два или повеќе различни платежни брендови платни инструменти засновани на картичка, под услов таквата услуга да се нуди од страна на Банката. Информациите за сите расположливи брендови картички и нивните карактеристики, вклучително и за нивната функционалност, сигурносните карактеристики и трошоците поврзани со нив, се ставени на располагање и јавно објавени на веб-страницата на Банката на следните врски: https://www.ttk.com.mk/Web/VISA_Classic_Debit и https://www.ttk.com.mk/Web/Mastercard Debit

3. Камати, надоместоци и девизни курсеви

Камата: Банката пресметува и евидентира камата по каматни стапки, во рокови, на начин и метод на пресметка во согласност со договорните одредби, со интерните акти на Банката и во согласност со законската регулатива.

Надоместоци: Почнувајќи од 1.1.2023 година, Банката го известува Корисникот за промените во Одлуката за Тарифа на надоместоци за услугите коишто ги врши Банката (Тарифа) најдоцна два месеци пред датумот на примена на измената. Корисникот на платежните услуги е должен да ја извести Банката дали ги прифаќа или не предложените измени пред датумот на примена на измените. Доколку Корисникот на платежните услуги не ја извести Банката, пред датумот на примена на измените, дека ги одбива истите, ќе се смета дека Корисникот на платежни услуги ги прифатил предложените измени во Тарифата. Со подзаконскиот акт во согласност со член 65, став 3 од ЗПУПС ќе се пропише стандардизираната содржина и форма на извештајот за надоместоци.

Девизен курс: Банката врши купување или продавање странски платежни средства (девизни) и ефективни странски пари (ефектива) по девизен курс кој е достапен преку моментално важечката последна курсна листа од тековниот ден, односно кој е договорен меѓу корисникот и Банката. Целосната курсна листа којашто постојано се ажурира се објавува на веб-страницата на Банката на следната врска: https://www.ttk.com.mk/Web/Курсна листа

Промените во висината на каматните стапки и девизниот курс ќе се применуваат веднаш и без претходно известување на Корисникот, под услов измената да се прави врз основа на менување на референтната каматна стапка или на референтниот девизен курс, за што веднаш ќе го извести Корисникот.

4. Комуникација меѓу Банката и Корисникот

За сите задолжувања за износот на трансакциите, трошоците, надоместоците и каматите кои настануваат при користење услуги и производи од страна на Корисникот, Банката го известува Корисникот преку Изводот за состојба и промени на сметка.

Со овозможувањето на 24-часовен пристап до услугите на електронско банкарство од страна на Банката, Корисникот се смета за уредно и навремено известен за сите промени, како за неговата сметка, така и за промените во работењето на Банката. Динамиката на следење на објавените информации, увидот во состојбата, промените и изводот на сметката се во целосна надлежност на Корисникот.

5. Заштита и корективни мерки

Корисникот на платежни услуги кој е овластен да го користи платниот инструмент е должен да ги преземе сите разумни мерки за заштита на корисничките сигурносни обележја на платниот инструмент, да го користи платниот инструмент во согласност со договорните услови како и да ја извести Банката веднаш по добивање сознание за губење, кражба, злоупотреба или неавторизирано користење на платниот инструмент.

Во случај на постоење сомнеж, измама или сигурносни опасности, Банката ќе го извести Корисникот на податоците оставени за контакт од страна на Корисникот во Банката, на начин договорен за комуникација меѓу Корисникот и Банката, а во согласност со законските прописи.

Ограничувања за користење платен инструмент (право на Банката да го блокира платниот инструмент). Кога платниот инструмент се користи за давање на согласноста за извршување на платежната трансакција, Корисникот и Банката може да договорат ограничување на потрошениот износ за платежните трансакции кои се извршуваат преку тој платен инструмент. Банката може да го блокира платниот инструмент, заради објективно оправдани причини предвидени со договорот при што го информира Корисникот, а доколку тоа не е можно, веднаш по блокирањето на платниот инструмент да го информира Корисникот за блокирањето и за причините за тоа, на начин утврден со договорот, освен во случај кога информирањето за блокирање на платниот инструмент е спротивно на закон или ако за тоа постојат објективно оправдани сигурносни причини. Банката ќе ја отстрани блокадата на платниот инструмент по престанокот на причините на блокирањето.

Корисникот може да биде одговорен за надоместување на загубите произлезени од извршени неавторизирани платежни трансакции заради загубен или украден платен инструмент или злоупотреба на платниот инструмент до максимален износ од 1.200 денари или соодветната противвредност во други валути.

Постапката и барањето за одговорноста или ослободувањето на Корисникот од одговорност се врши во согласност со член 90 од ЗПУПС.

Начинот на кој и временскиот период во кој Корисникот на платежни услуги ја известува Банката за секоја неавторизирана или неправилно иницирана или неправилно извршена платежна трансакција, како и одговорноста на Банката за неавторизираните платежни трансакции:

Доколку Банката изврши неавторизирана платежна или неправилно изврши платежна трансакција, Корисникот на платежни услуги има право да бара исправка во рок од 13 месеци од датумот на задолжување, а доколку Банката не му ги дала или не му ги ставила на располагање на Корисникот на платежни услуги информациите за извршувањето на неавторизирана или неправилно извршената платежна трансакција во согласност со закон, Корисникот може да го поднесе известувањето во кое било време. Во случај на извршена неавторизирана платежна трансакција, Банката на плаќачот ќе му го врати износот на неавторизираната платежна трансакција на плаќачот, веднаш по дознавањето за трансакцијата, а најдоцна до крајот на следниот работен ден, освен ако Банката има разумен основ да се сомнева во измама и таквиот основ да го пријави до соодветните надлежни органи на писмено.

Во случај да е одговорна за неавторизираната платежна трансакција, Банката е должна да изврши и поврат на износите на сите надоместоци. Во случај на извршување неавторизирана платежна трансакција, плаќачот има право на надоместок за претрпена штета од одговорниот давател на платежни услуги во согласност со Законот за облигационите односи.

Одговорноста на Банката за неавторизирани платежни трансакции за неизвршување, неправилно извршување или задоцнето извршување платежни трансакции се утврдува во согласност со член 102, 103 и 104 од ЗПУПС. Банката не одговара за штета доколку штетата предизвикана од неизвршување платежна трансакција е предизвикана од погрешно внесени податоци во налогот за пренос како и доколку штетата е предизвикана од објективни причини кои се надвор од контрола на Банката. Заштитата и корективните мерки ќе бидат детално предвидени со подзаконски акт на НБРСМ во согласност со член 42, став 9, точка 5 , член 124 и 125 од ЗПУПС.

6. Измени и раскинување договор

Постојните договори склучени со Корисниците се склучени на неопределено време и секоја промена, како и постапката за раскинување на договорот ќе се врши во согласност со Општите услови и со законската регулатива коишто ќе стапат на сила на 1.1.2023 година.

Банката ќе го известува Корисникот за сите промени во Договорот и во документите кои се негов составен дел, а кои се однесуваат на работењето со сметката и платежните услуги, преку Изводот за состојба и промени од сметката, подигнат на шалтерите на Банката во хартиена форма или во електронска форма, преку интернет банкарство и/или на веб-страницата на Банката, два месеци пред настанување на промената.

Доколку Корисникот не ја извести Банката пред датумот на примена на промените дека не се согласува со направените промени односно не поднесе барање за раскинување на Договорот, се смета дека Корисникот е согласен со промените и дека ги прифаќа во целост.

Корисникот во секој случај може да поднесе барање за раскинување на Договорот и да ја затвори платежната сметка со отказен рок, кој не може да биде подолг од 30 дена само доколку ги има подмирено своите обврски со кои е задолжен и коишто произлегуваат од користењето кој било производ или услуга во Банката, доколку сметката нема неизвршени платни налози за присилна наплата и доколку ги врати банкарските картички.

Раскинувањето на Договорот и затворањето на платежната сметка е без надоместок за Корисникот. Во случај на раскинување на Договорот и затворање на платежната сметка во согласност со кој надоместоците за платежните услуги од Корисникот се пресметуваат или наплатуваат на редовна основа, Банката ги наплатува надоместоците во висина којашто е сразмерна на периодот до раскинување на Договорот. 

Доколку Корисникот однапред ги платил надоместоците за платежните услуги, Банката е должна да му врати на Корисникот дел од износот на платените надоместоци кој е сразмерен на периодот од денот на раскинување на Договорот до последниот ден на периодот за кој надоместокот е платен.

Банката има право еднострано да го раскине Договорот доколку Корисникот не се придржува кон одредбите на Договорот и кон Општите услови со известување испратено до Корисникот најмалку два месеци пред денот на раскинување на Договорот.

Банката може да го достави до Корисникот известувањето за раскинување во писмена форма или на друг траен медиум, при што како уредна се смета доставата извршена во согласност со последно ажурираните податоци на Корисникот во Банката. По истекот на предвидениот рок, Банката ќе го раскине Договорот и ќе ја затвори платежната сметка, а доколку на платежната сметка има позитивно салдо, паричните средства ќе ги пренесе на евиденциска сметка со посебна намена. Со преносот на паричните средства на евиденциската сметка со посебна намена, не престанува правото на сопственост над паричните средства на Корисникот вклучувајќи ги подоблиците на правото на сопственост и другите права што произлегуваат од сопственоста. 

Банката ја затвора сметката на писмено барање на Корисникот или врз основа на одлуки на надлежни органи, во согласност со законските прописи со што Договорот се смета за автоматски раскинат само доколку Корисникот нема други активни сметки или производи во Банката. Во согласност со закон Банката ќе ја затвори сметката којашто нема салдо и нема промени во последните две години и нема неизвршени платни налози за присилна наплата, за што ќе го извести Корисникот.

Доколку дојде до промена на статусот на Корисникот-потрошувач од резидент во нерезидент, во тој случај Банката ќе ги затвори сметките на резидентот и ќе изврши еднократен пренос на средствата од резидентната девизна сметка и/или денарска сметка на девизна и/или денарска сметка којашто Корисникот ќе ја отвори во Банката како нерезидент.

Постапката за измени и раскинување на договор ќе биде детално предвидена со подзаконски акт на НБРСМ во согласност со член 42, став 9, точка 1 од ЗПУПС.

7. Правна заштита

За сите спорови коишто произлегуваат од договорот стварно и месно надлежен е судот во Скопје и се применуваат законските прописи на Република Северна Македонија.

Корисникот на платежни услуги може да поднесе приговор до Банката кога смета дека Банката не се придржува кон договорните одредби. Банката ги решава приговорите од корисниците на платежните услуги во согласност со договорните одредби и/или во согласност со ЗПУПС. Банката ќе му достави на Корисникот на платежни услуги одговор во врска со приговорот во писмена форма или на друг траен медиум, во рок од 15 работни дена од денот на приемот на приговорот. Рокот за решавање приговор (рекламација) за трансакција извршена со картичка го одредува Банката во согласност со правилата на Visa International и MasterCard Worldwide. Рекламациите во врска со платежните картички се поднесуваат на образец од Банката, на шалтерите на Банката означени за прием на рекламации по картички. Ако Банката не може да одговори во рокот од 15 дена заради причини кои се надвор од контрола на Банката, ќе го извести Корисникот на платежните услуги за доцнењето на одговорот со јасно наведување на причините и за рокот до кој Корисникот на платежни услуги ќе го добие одговорот, а кој не може да биде подолг од 35 работни дена од денот на приемот на приговорот.

Корисникот е должен да врши редовен увид во промените на сметките, да ги следи и контролира трансакциите веднаш по нивното извршување и да ги пријави сите рекламации во Банката веднаш без никакво одложување, со оглед на тоа дека има обврска да подигне извод на крајот на секој изминат месец.

Банката нема да ги земе предвид рекламации поднесени по истекот на законски предвидениот рок од 13 месеци. Корисникот на платежна услуга може да поднесе приговор/рекламација до Банката на начин утврден во договорот и во Општите услови. Во одговорот на приговорот (рекламацијата) Банката ќе го извести Корисникот на платежните услуги за најмалку едно овластено лице или орган надлежен за вонсудската постапка за решавање спорови во врска со правата и обврските кои произлегуваат од ЗПУПС. Корисникот кој претходно поднел приговор до Банката, има право на поднесување приговор до надлежниот орган – Народната банка на Република Северна Македонија со наоди за евентуални прекршувања на одредбите од ЗПУПС.

Условите и постапката за исправка на грешка кај платежните трансакции ќе бидат детално предвидени со подзаконски акт на НБРСМ во согласност со член 42, став 9, точка 5 од ЗПУПС.

Со почит,

ТТК Банка АД Скопје

Оваа информација е достапна за сите корисници на платежни услуги на ТТК Банка на веб-страницата на Банката www.ttk.com.mk и на видно место во секоја филијала и експозитура на Банката.

Датум на објава: 1.11.2022 година